ថ្ងៃចន្ទ ៦កើត ខែមាឃ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៣ ខែកុម្ភៈ ឆ្នាំ២០២៥
លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានចូលរួមពិធីសំណេះសំណាលជាមួយអាជីវករលក់ដុំ លក់រាយជីកសិកម្ម និងថ្នាំកសិកម្ម ក្រោមអធិបតីភាព ឯកឧត្ដម គង់ ចន្ទ័វាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម វ៉ី សំណាង អភិបាលនៃគណ:អភិបាលខេត្ត ព្រមទាំងមានការចូលរួមពីឯកឧត្តម លោកជំទាវ លោក លោកស្រីជាប្រតិភូអមដំណេីរ ថ្នាក់ដឹកនាំមន្ទីរកសិកម្ម រុក្ខាប្រមាញ់ និងនេសាទខេត្ត លោក លោកស្រីប្រធានការិយាល័យជំនាញខេត្តនិងមន្រ្តី មន្រ្តីផសព្វផ្សាយកសិកម្មឃុំ និងអាជីវករលក់ដុំ លក់រាយថ្នាំកសិកម្ម និងជីកសិកម្ម។ ពិធីនេះធ្វេីនៅមន្ទីរកសិកម្ម រុក្ខាប្រមាញ់ និងនេសាទខេត្ត។
ក្នុងឱកាសនោះ ឯកឧត្តម បានលេីកពីគោលនយោបាយអាទិភាពទី៥, ៦ របស់រាជរដ្ឋាភិបាលអាណត្តិទី៧ ស្តីពីការលេីកស្ទួយផលិតកម្មកសិកម្ម រកទីផ្សារ និងរក្សាលំនឹងថ្លៃកសិផល តាមរយ:ការផ្តល់ហិរញ្ញប្បទាន ការដារពង្រាយមន្រ្តីកសិកម្មឃុំ សង្កាត់ និងអភិវឌ្ឍន៍នូវសហគមន៍ទំនេីប ព្រមទាំងបានផ្តល់នូវអនុសាសន៍មួយចំនួន:
-ការជួយផ្សព្វផ្សាយពីការកង្វះទឹកដល់កសិករ នៅពេលខ្វះទឹក
-ការកត់ត្រាថ្លៃដេីមផលិត សូមកត់ត្រាអោយបានត្រឹមត្រូវកុំបញ្ចូលការចំណាយផ្ទាល់ខ្លួន
-អាជីវករទាំអស់យកចិត្តទុកដាក់រៀបចំកន្លែងលក់ជី ថ្នាំកសិកម្ម អោយបានសមស្របតាមបច្ចេកទេស ជៀសវាងហានិភ័យផ្សេងៗ
-សូមកុំលក់ផលិតផលជី ថ្នាំកសិកម្មខុសច្បាប់ គ្មានប្រភពច្បាស់លាស់ និងគ្មានច្បាប់អនុញ្ញាតិ
-អាជីវករ ជួយផ្សព្វផ្សាយបច្ចេកទេសប្រេីប្រាស់ជីថ្នាំកសិកម្ម ដល់កសិករ
ពេលរសៀល លោកប្រធាន និងមន្រ្តីជំនាញ បានចុះជួបប្រជាពលរដ្ឋ និងពិនិត្យមើលការខ្វះខាតទឹកនៅ ឃុំទ្រា និងឃុំជើងគួន ស្រុកសំរោង ព្រមទាំងបន្តមើលការបូមទឹកដាក់ស្រែរបស់ប្រជាពលរដ្ឋសង្គ្រោះស្រូវដែលខ្វះទឹក ពីប្រឡាយហនុមាន ដែលប្រជាពលរដ្ឋបូមទឹកបានប្រមាណ ៩៥% នៃផ្ទៃដី ៣ ៥២៣ ហិកតា សម្រាប់លើកទី១ ហើយនិងពិនិត្យមើលការបើកទ្វារទឹកនៅប្រឡាយហនុមានតំបន់ព្រំប្រទល់ស្រុកបាទី ជាមួយស្រុកសំរោង និងស្រុកព្រៃកប្បាស សម្រាប់សង្គ្រោះស្រូវដែលខ្វះទឹក នៅឃុំរវៀង ឃុំស្លា ឃុំជើងគួន និងឃុំទ្រា ស្រុកសំរោង ព្រមទាំងផ្នែកខ្លះនៃឃុំតាំងយ៉ាប ស្រុកព្រៃកប្បាស។
