ថ្ងៃសៅរ៍ ១០រោច ខែពិសាខ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១៦ ខែឧសភា ឆ្នាំ២០២០
លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តតាកែវ និងសហការីបានចុះពិនិត្យការងារដាំដុះបន្លែ នៅភូមិអង្គស្វាយចេក ឃុំចារ ស្រុកព្រៃកប្បាស។ កសិករកំពុងមមារញឹកដាំខ្ទឹមស្លឹក ត្រឡាច និងត្រសក់។ ក្នុងឱកាសនោះខ្ញុំបានផ្តល់អនុសាសន៍អោយបណ្តុំបន្លែ រៀបចំផលិតកម្មតាមកិច្ចសន្យាដើម្បីធានាដល់ទីផ្សារលក់កសិផល។ បន្ទាប់មកខ្ញុំ និងសហការីបានបន្តដំណើមកពិនិត្យមើលបណ្តុំកសិករដាំដំណាំឆៃថាវដែលមានសមាជិកចំនួន ៣៣នាក់នៅភូមិស្នោ ឃុំស្នោ ស្រុកព្រៃកប្បាស ជាក់ស្តែងដោយសារខ្វះខាតទឹកនិងក្តៅខ្លាំងពេក ធ្វើអោយកសិករនៅដាំឆៃថាវ មានចំនួនតែ ៥គ្រួសារ ប៉ុណ្ណោះ លើផ្ទៃដីប្រមាណជិត ២ហិកតា ហើយកសិករផ្សេងៗទៀតកំពុងដាំត្រសក់ សណ្តែកកួរ និងម្រះជាដើម។ ក្នុងមួយថ្ងៃបណ្តុំបានលក់បន្លែទៅអោយអ្នកប្រមូលទិញមកពីស្រុកស្អាងប្រមាណ ២០០ ទៅ ៥០០ គីឡូក្រាម ដោយតម្លែត្រសក់បច្ចុប្បន្ននេះ ១គីឡូតម្លៃ ១៥០០ ទៅ ២០០០រៀល និងសណ្តែកកួរតម្លៃ ២០០០ ទៅ ២៥០០រៀល។ ខ្ញុំក៏បានជម្រាបលោកប្រធានបណ្តុំ និងកសិករ ត្រូវរៀបចំអោយមានផលិតកម្មតាមកិច្ចសន្យាដើម្បីធានាថាកសិផលមានទីផ្សារ។ សូមជម្រាបផងដែរថាសម្រាប់ខេត្តតាកែវ ការដាំដុះបន្លែរហូតមកដល់ពេលនេះ បានប្រមាណ ៤៧៦ ហិកតា ចំនួននេះនិងមានការកើនឡើងបន្តទៀត ចំណែកឯតម្លៃបន្លែមានការកើនឡើងទ្វេដង បើប្រៀបនឹងឆ្នាំកន្លងមក។
រក្សាសិទិ្ធគ្រប់យ៉ាងដោយ ក្រសួងកសិកម្ម រុក្ខាប្រមាញ់ និងនេសាទ
រៀបចំដោយ មជ្ឈមណ្ឌលព័ត៌មាន និងឯកសារកសិកម្ម