ថ្ងៃពុធ ៥ កើត ខែមាឃ ឆ្នាំកុរ ឯកស័ក ពស ២៥៦៣ ត្រូវនឹងថ្ងៃទី២៩ ខែមករា ឆ្នាំ២០២០
....................................................................................................................................
សូមគោរព ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ
សូមគោរពឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ
សូមគោរព ឯកឧត្តម លោកជំទាវ សមាជិកក្រុមប្រឹក្សាខេត្តតាកែវ
សូមគោរព ឯកឧត្តម ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយក អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ
សូមគោរព ឯកឧត្តម លោកជំទាវ ភ្ញៀវជាតិ-អន្តរជាតិ លោក លោកស្រី លោកគ្រូ អ្នកគ្រូ សិស្សា នុសិស្ស លោកតាលោកយាយ និងបងប្អូនប្រជាកសិករ ទាំងអស់ជាទីគោរព រាប់អាន ។
ជារៀងរាល់ឆ្នាំ ក្រោយពេលបងប្អូនប្រជាកសិករបានបញ្ចប់ការប្រមូលនិងទុកដាក់ ផលស្រូវរួចរាល់ នៅតំបន់នេះបងប្អូនប្រជាកសិករតែងតែ ប្រារព្វពិធីបុណ្យដារភូមិជារៀងរាល់ឆ្នាំ ដែលមានលក្ខណៈ ប្រហាក់ប្រហែលនឹងបុណ្យដារលានដែរ។ បុណ្យដារលាននេះ ត្រូវបានអ្នកស្រុកហៅខុសៗគ្នាទៅតាម តំបន់នីមួយៗដែលតំបន់ខ្លះហៅថាបុណ្យដារលាន បុណ្យសាមគ្គី បុណ្យកណ្តាលភូមិ និងបុណ្យដារបាតលានជាដើម។ ទោះបីមានឈ្មោះខុសគ្នាក៏ពិតមែន តែគោលបំណងនៃពិធីបុណ្យដូចគ្នាគឺ ដើម្បីរំឮកគុណម្ចាស់ទឹកម្ចាស់ដី ដោយសារទឹកនិងដី ជាកត្តាចម្បងមិនអាចខ្វះបានសម្រាប់របរកសិកម្ម ជាពិសេសការផលិតស្រូវអង្ករសម្រាប់ ចិញ្ចឹមជីវិតពីមួយជំនាន់មកមួយជំនាន់បន្តគ្នារហូតមកហើយ ទឹកដី ព្រៃព្រឹក្សា នេះជាមរតកដ៏ត្រកាលដែលបុព្វបុរសខ្មែរបានការពារទុកសម្រាប់កូនចៅជំនាន់ ក្រោយៗប្រកបរបរចិញ្ចឹមជីវិត។ ទន្ទឹមនឹងនេះ ការរៀបចំពិធីបុណ្យនេះ គឺដើម្បីសុំខមាទោស នូវអំពើឆ្គាំឆ្គងទាំងឡាយដែលកូនចៅបានប្រព្រឹត្តប៉ះពាល់ក្នុងរដូវបង្កបង្កើនផលដូចជាការបន្ទោរបង់ទឹកមូត្រ ឬដើរជាន់លើវាលស្រែ និងការកាប់គាស់ភ្ជួររាស់ជាដើម ព្រោះព្រះធរណីជាប្រភពធ្វើឱ្យស្រូវដុះលូតលាស់។
ការរៀបចំពិធីបុណ្យដារលាននេះ មានគោលបំណងបំផុសបងប្អូនប្រជាកសិករខ្មែរឱ្យ ចូលរួមចំណែកអភិវឌ្ឍន៌វិស័យកសិកម្មក្នុងទិសដៅធានានិរន្តរភាពស្បៀង ភាពរីកចម្រើន នៃសេដ្ឋកិច្ចសង្គម និងរក្សាការពារ បាននូវវប្បធម៌ ប្រពៃណីជាតិផង។
ពិធីបុណ្យដារលាននេះ ជាពិធីបុណ្យទាក់ទងនឹងជំនឿសាសនាដែលប្រជាពលរដ្ឋភាគច្រើនជាកសិករតែងតែប្រកាន់ខ្ចាប់នូវប្រពៃណីប្រារព្វពិធីបុណ្យផេ្សងៗតាមរដូវកាល ជំនឿ និងធនធានរបស់ខ្លួន។ ពិធីបុណ្យដារលាននេះ ប្រារព្វឡើងជារៀងរាល់ឆ្នាំទៅតាមទំនៀម ទម្លាប់ប្រពៃណីខ្មែរ ដើម្បីរក្សាអត្តសញ្ញាណព្រលឹងជាតិខ្មែរឱ្យបានគង់វង្សក៏ដូចជាបង្កឱកាស ដល់កសិករឱ្យបានជួបជុំញាតិមិត្តជិតឆ្ងាយ ពង្រីកចំណង សាមគ្គីភាព មិត្តភាព និងចូលរួមផ្លាស់ប្តូរមតិយោបល់គ្នាលើការងារបង្កបង្កើនផលឆ្នាំកន្លងមកហើយជាពិសេស ដើម្បីចូលរួម កម្សាន្តសប្បាយបន្ទាប់ពីបានចំណាយអស់កម្លាំងកាយកម្លាំងចិត្តគ្រប់បែបយ៉ាង ក្រោមកម្តៅព្រះអាទិត្យ និងភ្លៀងផ្គរយ៉ាងប្តូរផ្តាច់ អស់រយៈពេលមួយរដូវនៃការងារបង្កបង្កើនផលរបស់ ខ្លួនកន្លងមក។
ក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយរដ្ឋមន្រ្តីនៃព្រះរាជាណាចក្រកម្ពុជា ដំណើរការអភិវឌ្ឍប្រទេសជាតិ រាជរដ្ឋាភិបាលបានចាត់ទុកវិស័យកសិកម្មជាវិស័យអាទិភាពគ្រប់កាលៈទេសៈ។ នៅឆ្នាំ២០១៨ តាមការវាយរម្លៃបាន បង្ហាញថា វិស័យកសិកម្មនៅកម្ពុជាបានចូលរួមចំណែកប្រមាណ ២៣,៥ភាគរយ នៃផលិតផលសរុប (ផសស) ក្នុងនោះវិស័យដំណាំ ៥៨.១ភាគរយ វិស័យផលិតកម្ម និងបសុព្យាបាល ១១.១ភាគរយ វិស័យជលផល ២៤ភាគរយ និងវិស័យព្រៃឈើប្រមាណ ៦.៧ភាគរយ។ ម្យ៉ាងទៀតខឿនសេដ្ឋកិច្ចជាតិក៏ពឹងផ្អែកមួយភាគធំលើវិស័យកសិកម្មដែលមានប្រជាជនជាង ៨០ភាគរយ ប្រកបរបរនេះ។ តាមរបាយការណ៍ របស់មន្ទីរកសិកម្ម រុក្ខាប្រមាញ់ និងនេសាទខេត្ត បានបង្ហាញថា ទូទាំងខេត្ត ផលិតស្រូវបាន ១ ២០៨ ៦៥០ តោន ហើយសល់ស្បៀងសម្រាប់នាំចេញ ចំនួន ៨២១ ៥០៧ តោន និងផលិតកម្ម បន្លែ ពងមាន់ ពងទា ចងក្រងជាបណ្តុំអាជីវកម្ម សម្រាប់នាំទៅលក់នៅទីផ្សារទំនើប នេះជាការឈានឡើងមួយកំរិត ដែលពីមុនឆ្នាំ១៩៩០ ខេត្តតាកែវខ្វះស្បៀង ហើយខេត្ត និងមន្ទីរ បានខិតខំផ្សព្វផ្សាយកែទំលាប់កសិករ ដែលដាំដុះ ស្រូវឡើងទឹកមកប្រើពូជទំនើប មិនប្រកាន់រដូវ អនុវត្ត ២ ទៅ ៣ដង ក្នុងមួយឆ្នាំ អាស្រ័យតាមស្ថានភាព នៃការអភិវឌ្ឍន៍ប្រព័ន្ធធារាសាស្រ្ត។ ជាក់ស្តែង នៅឃុំពត់សរ ប្រព័ន្ធធារាសាស្រ្តមួយផ្នែក គឺបង្ហៀរចូលស្រែតែម្តង។ ហើយ ឯកឧត្តមរដ្ឋមន្រ្តី បានចូល រួមចំណែកជាច្រើនទៅលើការបង្កើត និងស្តារប្រព័ន្ធធារាសាស្រ្ត នៅខេត្តតាកែវ និងលើក ទឹកចិត្តដល់កសិករដែលដាំបន្លែ និងកុងត្រាប្រមូលទិញតាមសហគមន៍ កសិកម្ម យកទៅ លក់នៅទីផ្សារភ្នំពេញ។ ឯកឧត្តម ចុះពិនិត្យផ្ទាល់ លើកទឹកចិត្តដល់កសិករចិញ្ជឹមមាន់ ភ្ញាស់កូនត្រី និងផ្តល់អនុសាសន៍ល្អៗ ដែលកត្តាមួយជំរុញមានការអភិវឌ្ឍន៍ រហូតមក ដល់ថ្ងៃនេះ ។
ទន្ទឹមនឹងនេះ ឯកឧត្តម នួន បូផល ប្រធានក្រុមការងារថ្នាក់ជាតិ ចុះជួយ ឃុំពត់សរ បានខិតខំជួយកសិករក្នុងការអភិវឍ្ឍន៍កសិកម្ម នៅក្នុងឃុំពត់សរនេះ ដែលពីមុន អនុវត្តដាំដុះបានតែម្តងក្នុងមួយឆ្នាំ ឥឡូវបានប្រមូលផល ២ ទៅ ៣ ដងក្នុងមួយឆ្នាំ។
ក្នុងឱកាសសំណេះសំណាលក្នុងពិធីបុណ្យដារលាននេះ ខ្ញុំសូមផ្តល់អនុសាសន៍ដូចខាងក្រោម ៖
ទី១- ត្រូវយកចិត្តដាក់ខ្ពស់ទៅលើការជ្រើសរើសពូជ ប្រភេទពូជស្រូវដែលទីផ្សារ ត្រូវការ ដែលឆ្លើយតបនឹងក្សេត្របរិស្ថាន និងយកគ្រាប់ពូជស្រូវសុទ្ធល្អមកធ្វើការដាំដុះ ដើម្បីទទួលបានទិន្នផលខ្ពស់ គុណភាពល្អ និងលក់បានថ្លៃខ្ពស់។ ការប្រើប្រាស់ពូជទាំងនេះ ក៏ត្រូវមានលក្ខណៈប្រមូលផ្តុំទៅតាមសហគមន៍ ឬមូលដ្ឋាននិមួយៗដែលសម ស្របទៅនឹងលក្ខណៈសម្បត្តិនៃពូជនិមួយៗ ដែលអាចផ្តល់នូវភាពងាយស្រួលដល់ការ ប្រមូលទិញនិងកែច្នៃ និងធានាបាននូវភាពសុទ្ធនៃពូជនិមួយៗ។
ទី២- ត្រូវយកចិត្តទុកដាក់ក្នុងការរៀបចំដីស្រែឱ្យបានត្រឹមត្រូវដោយភ្ជួររាស់ឱ្យសព្វល្អ និងកៀរពង្រាបឱ្យស្មើល្អដើម្បីបង្កលក្ខណៈ ងាយស្រួលដល់ការដាំដុះជាពិសេសការប្រើ ប្រាស់ឧបករណ៍ដាំជាជួរ ការគ្រប់គ្រងទឹក ការគ្រប់គ្រងជី និងការកម្ចាត់សមាសភាពចង្រៃ។
ទី៣- បន្តពង្រឹងការងារអប់រំផ្សព្វផ្សាយបច្ចេកទេសជូនដល់កសិករឲ្យកាន់តែទូលំ ទូលាយ និងស៊ីជម្រៅថែមទៀតតាមគ្រប់មធ្យោបាយជាអាទិ៍ ការចងក្រងបណ្តុំអាជីកម្ម ការបើកវគ្គបណ្ដុះបណ្ដាលបច្ចេកទេសរយៈពេលខ្លី ការធ្វើបង្ហាញ និងបង្កើតសហគមន៍ កសិកម្ម ដើម្បីងាយស្រួលក្នុងការទទួលយក បច្ចេកទេសថ្មីៗ ឥណទាន និងការស្វែងរកទីផ្សារជាដើម។
ទី៤- ពង្រឹងសមត្ថភាពបណ្តុំអាជីវកម្ម និងសហគមន៍កសិកម្ម ដើម្បីផលិតក្នុងទ្រង់ទ្រាយធំៗជាលក្ខណៈប្រមូលផ្តុំដោយអនុវត្តយន្តការ "ផលិតកម្មកសិកម្មតាមកិច្ចសន្យា" ដោយស្មោះត្រង់រវាងអ្នកផលិត និងអ្នកប្រមូលទិញ និងតាមគោលការណ៍ "ភូមិមួយផលិត ផលមួយ" ។
ទី៥- ជំរុញខ្លាំងក្លាការងារចិញ្ចឹមសត្វ ចិញ្ចឹមត្រី ការងារដាំដុះដំណាំរួមផ្សំគ្រប់ប្រភេទ និងបន្លែកុំឲ្យដីនៅទំនេរ ជាពិសេសឆ្លៀតប្រើប្រាស់ឲ្យអស់លទ្ធភាពនូវសំណើមដីស្រែក្រោយពេលប្រមូលផលស្រូវរួច។ ត្រូវចងចាំថា ដីជាកម្មសិទ្ធិរបស់យើង គឺជាឃ្លាំងប្រាក់ និងជៀស វាងការលក់ដូរទៅតាមការឡើង-ចុះនៃតម្លៃទីផ្សារដីដោយពុំបានពិចារណា។
ទី៦- លើកកម្ពស់បច្ចេកទេសប្រមូលផល និងក្រោយពេលប្រមូលផលដើម្បីកាត់ បន្ថយការបាត់បង់ផលស្រូវ និងបង្កើនគុណភាពស្រូវអង្ករដើម្បីទទួលបានតម្លៃខ្ពស់នៅ លើទីផ្សារ។ ជាមួយគ្នានេះដែរ ត្រូវបណ្តុះបណ្តាលកសិករអំពីបច្ចេកទេសប្រមូលផល និង ក្រោយពេលប្រមូលផលមានដូចជា៖ ការច្រូតកាត់ ការហាលសម្ងួត និងការទុកដាក់ឱ្យបានត្រឹមត្រូវដើម្បីធានាបាននូវគុណភាពស្រូវល្អជាដើម។
ទី៧- បន្តនូវប្រពៃណីល្អក្នុងកិច្ចសហការជាមួយអាជ្ញាធរមូលដ្ឋាន ស្ថាប័នជំនាញពាក់ ព័ន្ធគ្រប់លំដាប់ថ្នាក់និងដៃគូអភិវឌ្ឍន៍កសិកម្មនានាឲ្យបានកាន់តែល្អប្រសើរ ដើម្បីផ្តល់ព័ត៌មានថ្មីៗទាន់សភាព ការណ៍ស្ដីពីបច្ចេកទេសផលិតកម្មកសិកម្ម ឲ្យមានលក្ខណៈប្រទាក់ ក្រឡាគ្នាក្នុងស្មារតីសាមគ្គីភាពទូលាយ ដើម្បីរួមចំណែកដោះស្រាយនូវបញ្ហាទាំងឡាយ ដែលកសិករជួបប្រទះទាន់ពេលវេលា និងមានប្រសិទ្ធភាព។
ជាទីបញ្ចប់ខ្ញុំសូមថ្លែងនូវសេចក្តីអរគុណបំផុតជូនចំពោះ ឯកឧត្តម រដ្ឋមន្រ្តី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិកាក្រសួងកសិកម្ម រុក្ខាប្រមាញ់ និងនេសាទ និង ឯកឧត្តម ប្រតិភូរាជរដ្ឋាភិបាល ទទួលបន្ទុកជាអគ្គនាយក អគ្គនាយកដ្ឋានកសិកម្ម ឯកឧត្តម លោកជំទាវ លោក លោកស្រី ភ្ញៀវជាតិ-អន្តរជាតិ លោកគ្រូ អ្នកគ្រូ សិស្សា នុសិស្ស លោកតា លោកយាយ និងបងប្អូនប្រជាកសិករ ទាំងអស់ដែលបានចំណាយពេលវេលាដ៏មានតំលៃដើម្បីចូលរួម និងផ្តល់កត្តិយសដ៏ ឧត្តុងឧត្តមក្នុងពិធីនេះ និង សូមគោរពជូនពរ ក្នុងឧិកាសឆ្នាំថ្មី ឆ្នាំ២០២០ នេះ ជួបតែសេចក្តីសុខ និងទទួលបាននូវពុទ្ឋិពរ ទាំងប្រាំប្រការគឺៈ អាយុ វណ្ណៈ សុខៈ ពលៈ បដិពានៈ កុំបីឃ្លាងឃ្លាតឡើយ ៕
សូមអរគុណ!